Македонија во следните две недели влегува во период на изразена временска нестабилност, каде што сончевите денови и летните температури брзо ќе се менуваат со облаци, дожд и значително посвеж воздух, токму во пресрет на празниците.
Првите денови од периодот ќе личат на вистинско пролетно затишје. До крајот на неделата времето ќе остане стабилно, суво и претежно сончево, а температурите ќе бележат јасен пораст. Врвот на затоплувањето се очекува во недела, 26 април, кога живата во термометрите може да достигне околу 25 степени, создавајќи идеални услови за престој на отворено.
Но, ова пролетно затоплување ќе биде краткотрајно. Веќе кон крајот на месецот атмосферската слика почнува да се менува. Околу 29 април се најавува постепено зголемување на облачноста, проследено со локални нестабилности и појава на грмежи, сигнал дека стабилниот период полека завршува.
Промената ќе стане уште поизразена во празничните денови. На 30 април се очекуваат поинтензивни врнежи од дожд, додека 1 мај ќе донесе значително посвежо време, претежно облачно, со максимални температури кои нема да надминуваат околу 16 степени. Дополнително заладување се најавува за 2 мај, кога утрата ќе бидат студени, околу 5 степени, а дневните температури ќе се движат до 12 степени.
По овој нестабилен и свеж период, времето повторно ќе почне да се стабилизира. Од 4 мај се очекува постепено расчистување на облаците и враќање на сончеви интервали, а до 6 мај прогнозите најавуваат нов бран на затоплување со температури над 20 степени.
Метеоролозите предупредуваат дека промените ќе бидат чести и нагли, па граѓаните треба да бидат подготвени за брзи преоди од сонце во дожд и од топло во значително посвежо време.
…
