Општина Центар започна нова програма за практикантство со која им се отвора можност на младите да стекнат директно искуство во работата на локалната самоуправа.
Со иницијативата се предвидува вклучување на студенти и апсолвенти од различни факултети кои се жители на општината, а целта е да се зајакне административниот кадар со нови идеи и свеж пристап, истовремено овозможувајќи им на младите практична обука во реални работни услови.
Ангажманот ќе се одвива во различни сектори во рамките на општинската администрација, во зависност од потребите и организацијата на работата. Избраните практиканти ќе бидат вклучени во секојдневните процеси и активности, со што ќе имаат можност да научат како функционира локалната власт одвнатре.
Програмата предвидува и финансиски надоместок во висина од 15.000 денари месечно, а траењето на практикантството може да биде до шест месеци. Според објавениот повик, достапни се вкупно осум места.
Заинтересираните кандидати треба да достават барање за практикантство, доказ за студентски или апсолвентски статус, копија од лична карта, трансакциска сметка и кратка биографија. Документите се поднесуваат во архивата на Општина Центар, секој работен ден од 09:00 до 15:00 часот, во барака број 6.
Јавниот повик е отворен од 27 април до 10 мај 2026 година, додека почетокот на ангажманот е закажан за 1 јуни 2026 година. По завршувањето на рокот за аплицирање, кандидатите ќе бидат навремено известени за понатамошниот тек на постапката.
Дополнителни информации може да се добијат преку контакт телефоните 02/3203-600 и 02/3203-655, како и на vesna.mihajlovakukovska@centar.gov.mk.
…
