Над Блискиот Исток повторно се отвора можност за дипломатски пресврт. По недели остри закани, воени тензии и неизвесност околу Ормутскиот теснец, Вашингтон и Техеран испраќаат сигнали дека би можеле да зачекорат кон привремен договор што би го запрел конфликтот и би отворил нова рунда преговори.
Американскиот претседател Доналд Трамп изјави дека разговорите со Иран во изминатите денови биле „многу добри“ и оцени дека постои реална шанса кризата да добие брз епилог. Неговата порака дојде само кратко време откако повторно предупреди дека САД се подготвени за нови воени удари доколку преговорите пропаднат.
Според информации објавени од Ројтерс, на маса се наоѓа краток американски предлог-документ кој формално би означил прекин на судирите, а потоа би започнал ограничен период за интензивни дипломатски разговори. Во фокусот на тие преговори би биле неколку чувствителни прашања – евентуално повторно отворање на Ормутскиот теснец, ублажување на американските санкции и иднината на иранската нуклеарна програма.
Но, од Техеран не пристигнуваат сигнали дека договорот е блиску. Иранскиот пратеник Ебрахим Резаи оцени дека американскиот документ повеќе наликува на политички список со барања отколку на сериозна рамка за компромис. Слична порака испрати и претседателот на парламентот Мохамад Багер Галибаф, кој ги отфрли тврдењата дека двете страни се пред договор, обвинувајќи го Вашингтон дека создава медиумска слика за напредок кој во реалноста не постои.
Во меѓувреме, Белата куќа очекува официјален одговор од иранските власти во наредните два дена, објави Аксиос. Според американски медиумски извори, актуелниот предлог предвидува 30-дневен период на преговори, за време на кој би се договарале конкретните услови за трајно смирување на кризата.
Иако политичките позиции сè уште се далеку една од друга, самата можност за дипломатско придвижување веќе се почувствува на светските пазари. Цената на нафтата бележи пад, достигнувајќи најниско ниво во последните две недели, додека инвеститорите реагираа позитивно на сигналите дека опасноста од поширока регионална ескалација би можела да се намали.
…
