Американскиот производител на електрични возила Тесла повлекува 218.868 автомобили во САД, откако регулаторите предупредија за потенцијален безбедносен ризик поврзан со камерата за задно гледање, објави Националната администрација за безбедност на сообраќајот на автопатиштата (НХТСА).
Според информациите, проблемот се јавува кога возилото се става во рикверц: сликата од задната камера може да се појави со задоцнување. Тоа привремено ја намалува видливоста на возачот токму во момент кога таа е најпотребна, што, според регулаторите, може да ја зголеми веројатноста од сообраќајни незгоди.
Повлекувањето опфаќа неколку од најпознатите модели на компанијата, меѓу кои „Модел 3“, „Модел S“, „Модел X“ и „Модел Y“.
„Тесла“ реагираше брзо на проблемот, испорачувајќи софтверско ажурирање „преку воздух“ (ОТА – безжично ажурирање), со кое се очекува да се отстрани доцнењето во прикажувањето на сликата и да се врати нормалната функционалност на системот.
Оваа одлука доаѓа во период кога НХТСА неодамна ја затвори одделна истрага за околу 2,6 милиони возила на „Тесла“, поврзана со функцијата за далечинско движење на автомобилите, откако беше заклучено дека инцидентите поврзани со неа се случувале претежно при ниски брзини.
…
