Еден од лидерите на коалицијата ВЛЕН, Изет Меџити, преку емотивна и силна порака објави дека започнува ново политичко поглавје за Албанците во Македонија, најавувајќи обединување во една политичка сила под името „ВЛЕН“.
Во објавата, Меџити порача дека ова не е само политичка одлука, туку историски момент кој, како што наведува, не бил создаден „со калкулации, туку со верба“, и не со поделби, туку со обединување.
„Од многу гласови – еден глас. Од многу партии – една сила. Од надеж – победа“, напиша Меџити, нагласувајќи дека „ВЛЕН“ треба да стане заеднички албански политички фронт.
Тој во пораката истакнува дека новото обединување не е создадено за „поделба на функции и фотелји“, туку за, како што наведува, „промена на албанската политичка историја“.
Според Меџити, Албанците повеќе не сакаат изговори, туку конкретни резултати, развој, нови работни места и политичка сила која реално ќе одлучува.
„Албанците сакаат политика што навистина ги претставува и албанска моќ што одлучува. А таа сила денес има име – ВЛЕН“, порача тој.
Во објавата се потенцира и дека времето на поделби завршува, а започнува период на политичко обединување и заедничка борба.
„Времето на распарчување заврши. Дојде време Албанците да се обединат. Дојде време Албанците да победуваат“, наведува Меџити.
Тој пораката ја завршува со оценка дека ова не е почеток само на нова партија, туку „почеток на нова албанска ера“.
Најавата доаѓа во период на интензивни политички преструктуирања на албанскиот политички блок во Македонија, а останува да се види како ќе се реализира процесот на обединување и какви ќе бидат идните политички чекори на „ВЛЕН“.
…
