ОВР Прилеп поднесе известување против ученик во средно училиште од Прилеп, поради постоење основи на сомнение дека сторил кривично дело „компјутерски фалсификат“.
Според информациите од Министерството за внатрешни работи, пријавениот, лажно претставувајќи се како наставник по англиски јазик од основно училиште во Виница, креирал лажен профил на социјални мрежи и стапил во контакт со вработена во Министерството за образование и наука.
Таа, верувајќи дека станува збор за службена комуникација, му укажала дека разговори со наставници не треба да се водат преку социјални мрежи и му креирала службена електронска адреса на Министерството, по што му биле доделени и пристапни податоци за е-дневник како администратор преку нејзината корисничка сметка. Воедно, му било наложено да ја координира наставната комуникација меѓу наставниците.
На тој начин, осомничениот, како што соопшти МВР, добил пристап до податоци од наставници на државно ниво и учествувал во координација и работа со електронскиот дневник.
Во периодот од 2022 година до ноември 2025 година, до моментот кога поранешната в.д. директорка пријавила сомнежи за бришење податоци од системот, осомничениот ги избришал профилите поврзани со лажниот идентитет на социјалните мрежи, како и службениот профил на електронската пошта од Министерството за образование и наука, наведуваат од МВР.
