Кумановското обвинителство досега обезбедило докази дека 25-годишниот Трајко Бојковски од Старо Нагоричане убил четири жени и се обидел да убие уште две, во случај што обвинителите го опишуваат како прв сериски убиец во Македонија кај кого постојат елементи на фемицид и родово базирано насилство.
Според истрагата, Бојковски делата ги извршувал во периодот од јануари 2025 година до февруари 2026 година, кога бил откриен. Жртвите биле претежно повозрасни жени, освен една која имала 35 години.
Обвинителството информира дека психијатриското вештачење покажало оти осомничениот е пресметлив и способен да одговара за делата што ги сторил.
Според обвинителите, мотивот за злосторствата била омраза кон жените, а делата биле извршувани подмолно, од користољубие и со ниски побуди. Осомничениот добро го познавал теренот, ги следел жртвите, а потоа ги напаѓал.
„Колку што ми е мене познато, се работи за прв случај за кој од доказите произлегува дека се работи за сериски убиец кој сторил и кривично дело фемицид при вршење на родово базирано насилство. Истрагата ќе продолжи“, изјави обвинителот Љубомир Лапе.
Истрагата добила пресврт во февруари годинава, кога била пронајдена последната жртва полугола во својот дом. По тој случај, обвинителството почнало повторно да ги отвора и анализира претходните смртни случаи кои биле затворени како природна смрт.
Во рамки на истрагата биле ексхумирани три жени за кои постоеле сомнежи дека се жртви на убиства, а обдукциите потврдиле две убиства.
Во меѓувреме, полицијата поднесе кривични пријави против двајца лекари од кумановската болница, кои како мртвопроценители утврдиле природна смрт кај дел од жртвите, поради што тие биле погребани без да биде извршена обдукција.
Од истрагата засега нема сомнежи за полициските службеници кои учествувале во увидите.
Обвинителството не ја проширило истрагата ниту кон членови на семејството на осомничениот, иако во јавноста постоеле сомнежи и шпекулации насочени кон неговата мајка и очув.
Според информации што претходно беа објавени во медиумите, Бојковски уште како средношколец бил пријавуван во Центарот за социјални работи поради проблематично однесување, но не биле преземени конкретни мерки.
Жителите на Старо Нагоричане го опишувале како повлечено момче кое ретко комуницирало со луѓето, возело велосипед и чувало овци.
Обвинителството очекува обвинението против него да биде поднесено во рок од околу еден месец.
