Православните верници денеска ги чествуваат Светите маченици Тимотеј и Мавра – млад христијански брачен пар кој пострадал за верата во Христа во времето на суровите прогони на царот Диоклецијан.
Нивната животна приказна останала запаметена како едно од најтрогателните сведоштва за љубовта, верата и жртвата во раното христијанство.
Тимотеј и Мавра биле младоженци и само дваесет дена по нивната венчавка биле изведени пред суд поради тоа што јавно ја исповедале христијанската вера.
Тимотеј бил чтец во Црквата и служел во својот роден крај. Кога бил изведен пред тиваидскиот намесник Аријан, во 286 година, тој без страв признал дека е христијанин.
„Јас сум христијанин и чтец на Црквата Божја“, му одговорил Тимотеј на намесникот.
Откако одбил да се откаже од верата, започнало суровото мачење. Според преданието, на Тимотеј му ги прободеле ушите со железна прачка, а болките биле толку страшни што му излегле очните зеници. Потоа бил обесен со главата надолу и дополнително измачуван.
Неговата сопруга Мавра најпрво се исплашила од ужасните маки, но охрабрена од сопругот и таа јавно ја исповедала својата вера во Христа. Намесникот тогаш наредил и таа да биде мачена – ѝ ја искубале косата и ѝ ги отсекле прстите на рацете.
И покрај тешките измачувања, двајцата останале цврсти во верата. На крајот биле распнати на крстови еден спроти друг. Според црковното предание, цели девет дена виселе живи на крстовите, охрабрувајќи се меѓусебно и молејќи се на Бога.
На десеттиот ден ги предале своите души на Господ и биле прославени како маченици кои со страдањето ја посведочиле својата вера и љубов кон Христа.
Светите Тимотеј и Мавра денеска се почитуваат како симбол на непоколеблива вера, духовна сила и брачна љубов која не била скршена ниту од најтешките маки.
