Европската централна банка влегува во завршната фаза од редизајнот на евро банкнотите, процес што започна кон крајот на 2021 година и кој ќе донесе значајни промени во изгледот и структурата на апоените.
Една од најголемите новини е постепеното повлекување на банкнотата од 500 евра, која повеќе нема да се печати во новата серија. Одлуката, според ЕЦБ, е донесена со цел да се намали ризикот од перење пари и полесно следење на финансиските текови.
Сепак, граѓаните немаат причина за загриженост – постојните банкноти од 500 евра ќе продолжат да важат како законско средство за плаќање и ќе можат да се користат без временско ограничување.
Во рамки на проектот, ЕЦБ минатата година распиша конкурс за европски графички дизајнери, кои до крајот на месецов треба да ги достават своите финални предлози за новиот изглед на банкнотите. Потоа, решенијата ќе бидат разгледани од стручно жири и од Управниот совет на ЕЦБ.
Редизајнот ќе се темели на две главни теми – „Европска култура“ и „Реки и птици“. Целта е банкнотите да останат сигурно и ефикасно средство за плаќање, но и да станат поеколошки и подостапни за сите корисници.
Од ЕЦБ посочуваат дека новите материјали и производствени процеси треба да го намалат влијанието врз животната средина, а истовремено да придонесат за поголема инклузивност.
Воведувањето на новата серија евро банкноти се очекува по финализирањето на изборот на дизајнот и техничките решенија, што претставува една од најголемите промени во еврозоната во последните дваесет години.
…
