Државната комисија за спречување на корупцијата (ДКСК) ќе поднесе известување до Обвинителството против поранешни членови на Управниот одбор на ТЕЦ Неготино, кои во меѓувреме станале директори во ЕСМ, поради сомнежи дека истовремено примале плата и апанажа.
Случајот бил отворен по анонимна пријава доставена пред речиси две години, а на денешната седница антикорупционерите утврдиле дека во спорните исплати биле вклучени и поранешни членови на Надзорниот одбор на ТЕЦ Неготино, кои исто така ќе бидат опфатени во пријавата за злоупотреба на службената положба.
Според ДКСК, спорните исплати се случиле во периодот кога Владата донела одлука ТЕЦ Неготино да се спои со ЕСМ. Тогаш биле потпишани анекси на менаџерските договори, со одобрение од Надзорниот одбор, со кои било предвидено членовите на Управниот одбор да земаат и редовна плата и апанажа во траење од една година.
Според информациите објавени во медиумите, апанажите изнесувале повеќе од илјада евра месечно, додека ДКСК денеска соопшти дека за оваа намена биле предвидени околу 20.000 евра за сите директори и членови.
Случајот повторно го отвори прашањето за работењето на ТЕЦ Неготино, особено по обвинението против поранешната претседателка на ДКСК, Татјана Димитровска, која се товари дека оддавала службени тајни на тогашниот директор на ТЕЦ Неготино, Небојша Стојановиќ. Судската постапка за овој предмет сè уште трае.
Во меѓувреме, на почетокот на месецов Обвинителството за гонење организиран криминал и корупција ја запре истрагата за набавките на мазут за ТЕЦ Неготино, вредна 163 милиони евра, во која беа опфатени повеќе компании и поранешни функционери.
Актуелно е и судењето за предметот „Адитив“, поврзан со ЕСМ и ТЕЦ Неготино, каде што обвинети се шест поранешни директори на Електрани и поранешниот директор на ТЕЦ Неготино, Небојша Стојановиќ, за штета проценета на 6,4 милиони евра.
