Сериозна сообраќајна несреќа се случила утринава во белградската населба Дорќол, кога трамвај излетал од шините и директно удрил во зграда на аголот меѓу улиците „Цар Душан“ и „Книќанинова“.
Инцидентот се случил околу 9:30 часот, а според првичните информации, повеќе лица се пожалиле на повреди. Според неофицијални податоци, околу десетина лица пријавиле повреди, додека две жени кои се наоѓале во зградата во која удрил трамвајот се здобиле со полесни повреди.
На фотографиите и снимките што се шират на социјалните мрежи може да се види трамвајот кој под засега неутврдени околности излегол од шините и со силен удар завршил во објектот на аголот од двете улици.
Очевидци опишуваат драматични сцени непосредно по несреќата.
„Се движеше нормално, а потоа се слушна звук како да вози по калдрма. Беше како земјотрес. Луѓето скокаа низ прозорците“, изјавил очевидец за српските медиуми.
Екипи на Итната медицинска помош веднаш пристигнале на местото на несреќата, додека полициски екипи вршат увид за да ги утврдат причините за инцидентот.
Поради несреќата, трамвајскиот сообраќај во овој дел на градот е целосно прекинат, а во околината се создадени големи сообраќајни метежи, особено во правец кон Калемегдан.
Надлежните служби засега не соопштуваат што точно довело до излетувањето на трамвајот од шините, а истрагата е во тек.
