Управата за јавни приходи го објави Огласот за продажба на движни и недвижни ствари бр. 5/2026 на веб-порталот за е-аукции, http://e-aukcii.ujp.gov.mk Заинтересираните граѓани и компании можат да учествуваат во електронската јавна аукција која ќе се одржи на 9 јуни 2026 година, во периодот од 11:00 до 13:00 часот.
Од УЈП информираат дека сите предмети кои се ставени на продажба се достапни за увид на порталот за е-аукции, каде што се објавени деталите за движниот и недвижниот имот.
Право на учество на електронската аукција имаат лицата кои успешно се регистрирале на порталот и навремено уплатиле депозит во висина од 10 проценти од проценетата вредност на стварите што се продаваат. По уплатата на депозитот, учесниците добиваат потврда по електронска пошта дека ги исполнуваат условите за учество.
Од УЈП посочуваат дека по креирањето на кориснички профил, регистрацијата за наддавање може да се изврши најдоцна до крајниот рок за уплата на депозитот.
За стварите што ќе се продаваат по пат на усна слободна комерцијална продажба, заинтересираните треба да достават понуда во затворен плик со назнака „ПОНУДА ЗА СЛОБОДНА КОМЕРЦИЈАЛНА ПРОДАЖБА ПО ОГЛАС 05/2026“ (НЕ ОТВАРАЈ).
Понудите треба да се достават до УЈП РД Прилеп и УЈП РД Струмица – Одделение за наплата на долгови, најдоцна до 2 јуни 2026 година до 16:00 часот.
Отворањето на понудите ќе се одржи на 9 јуни 2026 година, во периодот од 11:00 до 13:00 часот.
Во понудата задолжително треба да се наведат контакт податоци, телефонски број и е-пошта. Од УЈП потсетуваат дека стварите се продаваат по принципот „видено – купено“.
…
