Градоначалникот на Битола, Тони Коњановски, соопшти дека ја прифаќа оставката на управувачката структура на ФК Пелистер, техничкиот директор и стручниот штаб, по поразот на клубот во Кавадарци и испаѓањето во Втората лига.
Во обраќање до граѓаните, навивачите и љубителите на фудбалот, Коњановски оцени дека денешниот ден е тежок за спортот во Битола и дека неуспехот на Пелистер претставува големо разочарување за сите битолчани.
Тој најави дека веднаш ќе побара да се изврши ревизија на досегашното работење на клубот, со цел да се добие јасна слика за состојбите и да се создадат услови за нов почеток.
„Ќе се продолжи напред со јасна слика, нови планови и нови кадри кои ќе го водат клубот кон победи и резултати на кои сите ќе бидеме горди“, истакна Коњановски.
Градоначалникот нагласи дека ФК Пелистер бил и мора да остане гордост на Битола, додавајќи дека за тоа е потребна поголема ангажираност од сите – од локалната самоуправа и клупските раководни структури, до играчите на теренот.
Според него, поразот треба да послужи како поука за да се утврдат грешките и да се преземат мерки за подобрување, во интерес на клубот и на градот Битола.
