Иран од почетокот на конфликтот оштетил најмалку 20 американски воени локации на Блискиот Исток, покажува анализа на Би-Би-Си базирана на сателитски снимки и видео материјали. Според извештајот, размерите на нападите биле значително поголеми од она што досега јавно го соопштуваа американските власти.
Нападите погодиле американски бази и воени објекти во осум држави – Саудиска Арабија, Обединетите Арапски Емирати, Катар, Кувајт, Ирак, Јордан, Бахреин и Оман.
Меѓу оштетената воена опрема се наведуваат напредни системи за противракетна одбрана THAAD, авиони за дополнување гориво во воздух, радари, командни центри и комуникациски системи. Во одредени бази биле погодени и хангари, складишта за гориво, како и објекти за сместување на воениот персонал.
Според проценките на американското Министерство за одбрана, операцијата „Epic Fury“ досега чинела околу 29 милијарди долари. Значителен дел од тие средства ќе бидат насочени кон поправка и замена на оштетената опрема и инфраструктура.
Во анализата се наведува дека Иран со текот на времето ја променил стратегијата на дејствување. Наместо масовни ракетни напади, Техеран почнал да изведува помал број удари со значително поголема прецизност, насочувајќи ги кон цели од висока стратешка вредност.
Иранските власти тврдат дека нападите биле одговор на американско-израелските операции врз иранска територија. Од друга страна, американските претставници засега не ги коментираат деталите од анализата, наведувајќи безбедносни причини.
И покрај постигнатото примирје, експертите предупредуваат дека ситуацијата останува нестабилна и дека евентуално обновување на судирите би можело дополнително да ги загрози американските воени позиции во регионот.
…
