Долги колони и повеќечасовни чекања беа забележани вчеравечер на граничниот премин Евзони на македонско-грчката граница, каде што голем број граѓани се враќаа дома по продолжениот викенд поминат во Грција.
Според информациите од терен, за влез во Македонија се чекаше и повеќе од два часа, а колоните од возила се протегаа на неколку километри. Зголемениот број патници значително го забави сообраќајот на преминот, особено во вечерните часови кога најголем дел од туристите тргнаа кон дома.
Дополнителни задржувања предизвика и постепеното воведување на новиот европски Систем за влез/излез (EES), кој се применува на надворешните граници на Европската Унија. Новиот систем предвидува електронска регистрација на патниците од земјите кои не се членки на ЕУ, што ги продолжува граничните процедури.
Надлежните апелираа до возачите за трпение и внимателно возење, имајќи ја предвид зголемената фреквенција на возила и можноста за дополнителни задржувања на граничните премини.
…
