Управата за финансиска полиција поднесе кривична пријава до Основното јавно обвинителство Скопје против странски државјанин, во својство на сопственик и управител на правно лице, како и против самото правно лице, поради сомневање за сторено кривично дело злоупотреба на постапка за јавен повик и јавна набавка, согласно член 275-в од Кривичниот законик.
Како што соопштуваат од Управата, пријавениот С.Г.О.Б., во текот на реализација на договор за проектот „Рехабилитација и проширување на канализационата мрежа во Општина Кичево“, свесно ги прекршил договорните обврски и пропишаните процедури.
Договорот бил склучен во 2023 година со Министерството за финансии – Сектор за централно финансирање и склучување на договори, во рамки на Секторската оперативна програма за животна средина и климатски акции за ИПА II (2014–2020), финансирана од Европската комисија и Буџетот на Република Северна Македонија.
Според наводите, пријавениот бил должен да обезбеди важечка банкарска гаранција и да достави барање за одобрување на подизведувачи до надлежниот орган, но наместо тоа не ја открил информацијата дека банката „Muganbank“ од Азербејџан, која ја издала гаранцијата, отишла во стечај. Со тоа, гаранцијата станала неважечка, без да биде пријавена.
Дополнително, пријавениот ангажирал подизведувачи без претходно одобрение од Министерството за финансии и надзорните институции, со што постапил спротивно на договорните услови. Поради овие неправилности, договорот бил раскинат.
Од Финансиската полиција наведуваат дека со ваквите дејствија е предизвикана штета на Буџетот на Република Северна Македонија во износ од 127.425.036 денари, како и загуба на ИПА средства во вредност од 9.474.132 евра, кои државата ќе мора да ги обезбеди од сопствени извори.
Истрагата е доставена до надлежното обвинителство за понатамошна постапка.
…
