Царинската управа поднесе кривична пријава до Основното јавно обвинителство Скопје против доктор и медицинска сестра, осомничени за обид за криумчарење на 199 вијали ботокс преку поштенска пратка која била лажно декларирана како козметички примероци.
Според информациите од Царинската управа, вредноста на запленетите производи изнесува околу 615.000 денари, додека во документацијата пратката била пријавена како 10 козметички примероци со вкупна вредност од 80 американски долари.
Случајот бил откриен од царински службеници на Царинската испостава Скопје 1 при детална контрола на поштенска пратка наменета за увозно царинење. При проверката, наместо декларираните производи, биле пронајдени 199 вијали ботокс што се користат во естетската медицина.
По откривањето на случајот, Одделението за истраги при Царинската управа спровело предистражна постапка, а по наредба на јавен обвинител биле извршени претреси на три локации.
Според наодите од истрагата, првоосомничениот, вработен како доктор во Универзитетскиот клинички центар „Мајка Тереза“, ја нарачал пратката од компанија во Република Кореја и договорил производите во фактурата да бидат прикажани како козметички производи со значително пониска вредност.
Второосомничената, медицинска сестра во истиот клинички центар, според истрагата се согласила пратката да пристигне на нејзино име и адреса, а фактурата била платена преку нејзината трансакциска сметка.
Против двајцата се поднесени кривични пријави за делата „криумчарење“ и „царинска измама“.
Од Царинската управа нагласуваат дека увозот на ботокс е строго регулиран и подлежи на посебни дозволи од надлежните институции, додавајќи дека секој обид за незаконски увоз на вакви производи ќе биде санкциониран согласно законските прописи.
…
