Министерството за внатрешни работи воведе измени во правилникот со кој се уредуваат однесувањето и меѓусебните односи на вработените, со што се либерализираат дел од правилата поврзани со изгледот на униформираните полициски службеници.
Според новите измени, на полициските службеници им е дозволено носење брада и одредени видливи тетоважи, но исклучиво доколку се во рамки на пропишаните стандарди за професионален изглед и не го нарушуваат угледот на службата.
Од Министерството за внатрешни работи информираат дека правилникот бил донесен на 4 мај годинава, а измените биле разгледани по иницијатива на Гранскиот независен синдикат на полицијата. По прифаќањето, новите одредби стапиле во сила на 1 јуни 2026 година.
Во однос на брадата, правилата предвидуваат таа да биде кратка, уредно обликувана и редовно одржувана, при што не смее да го нарушува службениот изглед ниту да ја попречува употребата на заштитна опрема, вклучително и заштитни маски.
Правилникот пропишува и дека униформираните службеници мора да бидат уредно потстрижени, со коса која не смее да ги покрива ушите ниту да паѓа под јаката на униформата.
Во делот на тетоважите, дозволени се само оние кои не содржат навредлива, расистичка или вулгарна содржина, а видливи можат да бидат исклучиво на горните екстремитети, додека останатите мора да бидат покриени со униформата.
Дополнително, се дозволува носење само еден вид накит – прстен, додека мустаќите не смеат да се спуштаат под линијата на горната усна.
Од Независниот синдикат на полицијата оценуваат дека измените претставуваат чекор во насока на модернизација на правилата, при што се задржуваат принципите на дисциплина, професионалност и достоинство во полициската служба.
…
