Регулаторната комисија за енергетика (РКЕ) подготвува анализа за можни измени на системот на евтини тарифи за електрична енергија, со цел граѓаните да плаќаат пониски сметки и подобро да се искористи производството од сончевите електрани.
Според претседателот на РКЕ, Ацо Ристов, се разгледуваат повеќе опции, меѓу кои продолжување на евтината дневна тарифа, воведување евтина струја и во сабота, како и намалување или укинување на дел од постојната ноќна евтина тарифа.
Анализите покажуваат дека најголем потенцијал има во периодот од 11 до 15 часот, кога на регионалните пазари има вишок електрична енергија, а цените се најниски. Поради тоа, РКЕ размислува евтината тарифа да биде достапна токму во овие часови, со што домаќинствата би биле поттикнати поголем дел од потрошувачката да ја префрлат во текот на денот.
Истовремено, се преиспитува оправданоста на сегашната ноќна евтина тарифа. Според Ристов, цените на електричната енергија на берзите денес често се највисоки токму во вечерните часови кога кај нас важи пониската тарифа, што отвора прашања за економската оправданост на постојниот модел.
На маса е и предлогот евтината тарифа да важи и во сабота, покрај недела. Причината е што за време на викендите индустриската потрошувачка е значително помала, па на пазарот остануваат поголеми количини електрична енергија кои би можеле да им бидат достапни на домаќинствата по пониска цена.
Од РКЕ нагласуваат дека сè уште не е донесена конечна одлука и дека во тек се детални пресметки за да се утврди дали предложените измени ќе донесат реални заштеди за граѓаните.
Доколку резултатите од анализите бидат позитивни, новиот тарифен модел би можел да стапи во сила од 1 јануари 2027 година. Можно е дел од мерките да се применуваат сезонски, особено во периодите кога производството од сончевите електрани е најголемо.
Пред евентуалното воведување на новите правила, ќе се организира јавна расправа и консултации со сите засегнати страни.
…
