Националниот превентивен механизам (НПМ) при Народниот правобранител изнесе наводи за сериозни неправилности во психијатриската болница „Демир Хисар“, каде, според нивни наоди, околу 20 осуденици без психичко заболување биле упатени на лекување наместо на издржување затворска казна.
Според извештајот презентиран од заменичката-омбудсман Соња Трифуновска, при контрола спроведена во декември 2025 година биле затекнати лица кои се пресметливи и здрави, но преку, како што се наведува, сомнителни судско-психијатриски вештачења биле пренасочени кон форензичко лекување.
НПМ посочува дека за случајот е побарано објаснување и од Комората на вештаци, со цел да се провери примената на етичките и професионалните стандарди во изработката на експертизите.
Во извештајот се наведува дека со години се констатираат сериозни проблеми во повеќе затворски установи во земјата, меѓу кои Идризово, Скопје, Куманово, Струга и Охрид, како и во воспитно-поправни и полициски установи, каде условите за работа и престој се оценети како незадоволителни.
Трифуновска предупредува дека ваквите случаи може да доведат до нарушување на принципот на еднаквост пред законот, доколку санкциите не се темелат на објективни и независни медицински проценки.
Таа додава дека вработените во „Демир Хисар“ се изложени на зголемен ризик, додека дел од сместените лица, кои се од криминален профил, ја злоупотребуваат системската празнина. Според неа, тоа влијае и на вистинските пациенти, кои добиваат помалку внимание и подолги чекања за третман.
НПМ најавува продолжување на надзорот и препораки за надминување на утврдените состојби.
…
