Вкупно 12 пожари на отворен простор се регистрирани во земјава до 13 часот, од кои пет се сè уште активни, еден е ставен под контрола, а шест се целосно изгаснати, информира Центарот за управување со кризи.
Активни се пожарите во Општина Студеничани, каде огнот се шири на потегот од село Моране преку Вртекица до Рамни Габер и зафаќа мешана шума.
Пожари има и во Општина Македонски Брод, во местото Видуш, кај селата Драгов Дол и Локвица, каде гори ниска вегетација, нискостеблеста шума и грмушки.
Активен е и пожарот во Општините Јегуновце и Сарај, кај селата Копанце и Туденце, со проширување кон Бојане, каде е зафатена мешана шума.
Во Општина Прилеп активен е пожарот кај селото Чаниште, каде гори ниска вегетација.
Најсериозна е состојбата во Општина Старо Нагоричане, каде пожарот кај селата Орах, Диманце и Руганце зафатил шумска површина, а во огнот е зафатена и една куќа.
Пожарот кај депонијата во Делчево е ставен под контрола.
Во меѓувреме, целосно се изгаснати пожарите кај Милетино во Општина Брвеница, Железница во Општина Кратово, Ветуница во Општина Ранковце, како и пожарот на потегот меѓу Велес и Зелениково, кај С’лп, Горно Село, Карабуниште и Бузалково.
Изгаснати се и пожарите во Батинци, Општина Студеничани, како и во Палиград, Општина Зелениково.
Од ЦУК продолжуваат да ја следат состојбата на терен и апелираат на внимателност поради високата опасност од ширење на пожари на отворен простор.
…
