Над 5,6 милиони евра се инвестираат во капитални проекти во општина Струга преку поддршката од Министерството за транспорт, информира вицепремиерот и министер за транспорт и врски Александар Николоски.
Средствата се насочени кон реализација на повеќе проекти поврзани со изградба и унапредување на булевари, улици и комуналната инфраструктура во Струга.
Како што посочи Николоски, преку Министерството за транспорт се гради булеварот „Туристичка“, проект вреден 175 милиони денари. Во тек е и изградбата на улицата „Источно Колекторска“, која треба да се поврзе со улицата „Туристичка“.
Покрај сообраќајната инфраструктура, со поддршка на Владата се реализираат и неколку проекти за изградба на канализациони системи на територијата на општина Струга.
Николоски информираше и дека со градоначалникот на Струга, Менди Ќура, разговарале за реализација на нов проект – продолжување на улицата „Колекторска“ до регионалниот, односно магистралниот пат што ги поврзува Струга и Охрид, кај Мислешево.
Според Николоски, инвестициите треба да придонесат за подобрување на патната и комуналната инфраструктура и за подобро поврзување на Струга со околните населени места.
…
