Инцидент предизвика безбедносна тревога во германската покраина Бранденбург, откако трафостаница во близина на електраната на лигнит Јеншвалде, во областа Шпре-Најсе, била повеќепати погодена со импровизирани направи наполнети со експлозив.
Според германскиот весник „Märkische Allgemeine Zeitung“ (MAZ), кој се повикува на извори од безбедносни и деловни кругови, врз објектот биле истрелани импровизирани ракети. По инцидентот, надлежните служби на локацијата пронашле и дополнителни направи, кои биле деактивирани.
Сепак, германската полиција засега не го потврдува официјално случајот како ракетен напад.
Портпаролката на полицијата за телевизијата n-tv изјавила дека во близина на трафостаницата биле пронајдени повеќе импровизирани експлозивни и запаливи направи.
Истрагата е во тек, а надлежните органи сè уште не соопштуваат детали за можниот мотив, ниту пак има информации за осомничени лица.
Инцидентот се истражува со особено внимание поради близината на електраната Јеншвалде, која претставува значаен дел од енергетската инфраструктура во регионот.
…
