Полицаец бил нападнат и повреден во инцидент што се случил во близина на граничниот премин „Блаце“, откако полициска екипа се обидела да запре возило за кое постоеле сомневања дека превезува криумчарена стока.
Според информациите од Министерството за внатрешни работи, инцидентот се случил вчера околу 17 часот во близина на местото „Вражји вир“, на патот од граничниот премин „Блаце“ кон Скопје.
Полициските службеници од Регионалниот центар за гранични работи – Север забележале товарно возило „Фолксваген транспортер“ со странски регистарски ознаки, натоварено со разновидна стока за која постоеле сомневања дека е предмет на криумчарење.
Возачот не застанал на дадениот знак од полицајците и продолжил да се движи, по што полициската екипа успеала да го запре возилото.
При обидот да го приведат возачот, на местото пристигнало уште едно возило. Од него излегло лице кое физички нападнало еден од полициските службеници.
Во текот на инцидентот, едно од лицата го фатило полицаецот за раката, по што тој бил влечен од возилото кое го управувало другото лице.
Полицаецот бил пуштен во движење, паднал на земја и се здобил со повреди.
По инцидентот, лицата со возилата го напуштиле местото и засега не е познато каде се упатиле.
МВР презема мерки за расчистување на случајот и пронаоѓање на лицата инволвирани во нападот и криумчарењето.
…
