Американскиот претседател Доналд Трамп објави дека Европа се согласила да ослободи големи количества дизел од стратешките резерви, во момент кога светските цени на горивата се под силен притисок.
Набргу потоа беше потврдено дека лидерите на Г7 постигнале договор за координирано ослободување до 100 милиони барели дизел и сурова нафта од стратешките резерви. Мерката ќе се спроведува во текот на четири месеци, под координација на Меѓународната агенција за енергетика.
Според заедничката изјава на Г7, значаен дел од дизел резервите ќе биде ослободен уште во првите 20 дена, со цел побрзо да се зголеми понудата на пазарот. Земјите дополнително ќе разговараат и за можноста за ново ослободување на дизел доколку ситуацијата го бара тоа.
Францускиот претседател Емануел Макрон, кој претседава со Г7, потврди дека лидерите се договориле и рафинериите да работат со поголема искористеност на капацитетите каде што тоа е можно. Истовремено, Г7 се обврза да не воведува ограничувања на извозот на енергија и нафтени деривати меѓу земјите членки.
Одлуката доаѓа во период на силен притисок врз пазарот на дизел. Според Ројтерс, цените на нафтата реагирале со пад по најавата за ослободување на резервите, бидејќи инвеститорите очекуваат дополнителна понуда на пазарот.
Од Г7 наведуваат дека мерките имаат цел да помогнат во стабилизирањето на енергетските пазари и да се намалат притисоците врз цените на горивата.
…
