Сенаторот Линдзи Греам потврди дека американскиот претседател Доналд Трамп го одобрил новиот пакет санкции против Русија, што може да се одрази и на нејзините економски партнери како Кина и Индија. Според Греам, гласањето за законот во Сенатот би можело да се одржи веќе следната недела, со поддршка од Белата куќа.
„Ова е момент кој не чека: Украина прави отстапки за мир, додека Путин продолжува да убива невини луѓе“, истакна сенаторот, повикувајќи на „навремено и цврсто гласање“. Предлог-законот предвидува воведување на секундарни санкции за држави кои продолжуваат да купуваат руска нафта и гас, со цел да се засили притисокот врз Москва и нејзините сојузници.
Американските аналитичари оценуваат дека со експлицитната поддршка од Трамп, законот конечно има реални шанси да помине, откако претходни обиди беа блокирани од процедурни пречки.
Меѓутоа, дипломатските кругови предупредуваат на потенцијален нов развој: по извештаите за успешна американска акција во Венецуела и апсењето на Николас Мадуро, САД би можеле да направат „трампа“ – да ѝ дадат поголема слобода на Русија во Украина во замена за целосна контрола над Западната хемисфера. Оваа загриженост, како што нагласуваат медиумите, не е нова, но повторно се актуелизира во сенката на меѓународната криза.
