Велика Британија објави дека ќе обезбеди 200 милиони фунти (околу 230 милиони евра) за финансирање на подготовки за евентуално распоредување на војници во Украина, откако оваа недела се договори за поддршка на мултинационални сили во случај на прекин на огнот.
На состанокот на високо ниво на „Коалицијата на подготвените“, британскиот премиер Кир Стармер, францускиот претседател Емануел Макрон и украинскиот претседател Володимир Зеленски ја потпишаа декларацијата за намера, која ја дефинира потенцијалната иднина на распоредување на трупите.
Британскиот министер за одбрана Џон Хили појасни дека средствата ќе бидат искористени за надградба на воените возила, комуникациските системи, заштита од беспилотни летала и за обезбедување подготвеност на војниците за евентуално распоредување.
Објавата доаѓа во период на зголемена тензија, откако Русија лансираше моќна хиперсонична ракета „Орешник“, што западните сојузници ја протолкуваа како обид за заплашување за поддршка на Украина.
Лондон не открива колку војници би биле испратени, а Стармер потврди дека плановите се уште се финализираат. Министерството за одбрана истакнува дека инвестицијата испраќа јасен сигнал до сојузниците и противниците дека Велика Британија е подготвена да ги исполни своите ветувања за поддршка на мирот во Украина.
