Управата за хидрометеоролошки работи (УХМР) предупреди дека денес најголема опасност од излевања на реки и појави на заезерување на водата има во југозападните и западните региони на земјата.
Од утринава се забележува зголемување на водостоите на реките Коселска, Сатеска, Ресенска и на помалите суводолници во регионот, каде се можни локални излевања. Во Охридско-Преспанскиот и Струшкиот регион се очекува реакција на помалите реки и суводолници, а во Струшкото Поле може да се појави заезерување на водата поради интеракција на подземните и површинските води.
Висок е водостојот и на реката Вардар во горниот дел од сливот, со можни локални излевања во Гостиварскиот регион и појави на заезерување во Полошката Котлина. Реката Црна во долниот дел од течението исто така е со висок водостој и се очекуваат локални излевања и заезерувања во Пелагониската Котлина и во делови од Битолско-Прилепскиот регион. Во горниот дел на сливот, иако нема значително зголемување на водостојот, можни се заезерувања во Демир Хисарскиот регион.
Реката Треска, исто така, е со висок водостој и се предвидуваат локални излевања и заезерувања во целиот слив, вклучително и во Кичевскиот регион.
УХМР посочува дека врнежите денес ќе бидат од дожд и снег на повисоките места, а на пониските од дожд. Во попладневните часови, по 18:00 часот, се очекува северен ветер и заладување на времето, при што врнежите ќе преминат во снег.
Властите апелираат на внимателно движење покрај реките и суводолниците, особено во југозападните, западните и северозападните делови на земјата.
