За судијата Ѓоко Ристов засега нема да се бара определување притвор, ниту има информации дека тој е задржан од надлежните органи. Ристов и понатаму ужива судиски имунитет, кој може да биде одземен од Судскиот совет по барање на судија на претходна постапка.
Од Обвинителството за гонење на организиран криминал и корупција информираат дека истрагата е во тек и дека конечна одлука за евентуални мерки ќе биде донесена во наредните денови.
„Се продолжува со постапувањето и јавниот обвинител, ценејќи ги сите околности, деновиве ќе процени во однос на мерки за обезбедување на присуство на осомничениот, за што јавноста ќе биде навремено информирана“, соопштуваат од ОЈО-ГОКК.
Ристов е осомничен за противправно стекнување и прикривање имот. За време на претрес во домот на неговите родители во Неготино, извршен по судска наредба, биле пронајдени 350.000 евра скриени во соѕидан простор во ѕид.
Обвинителството наведува дека парите се сомнителни како незаконски стекнати и дека случајот е дел од поширока истрага за висока корупција, поткрепена со информации од Агенцијата за национална безбедност. Истражните дејствија продолжуваат, а во зависност од нивниот исход ќе се одлучува дали ќе се побара притвор и одземање на судискиот имунитет.
