Седум лица загинаа, а еден член на екипажот е тешко повреден во авионска несреќа што се случи на аеродромот Бангор во сојузната држава Мејн, кога приватен авион се урнал за време на полетување. Несреќата се случила во неделата навечер, во услови на силна снежна бура која предизвика сериозни нарушувања во сообраќајот низ Соединетите Американски Држави.
Според Федералната администрација за воздухопловство, деловниот авион „Бомбардиер Челинџер 600“ се урнал кратко по полетувањето и веднаш се запалил. Директорот на аеродромот Бангор, Хозе Сааведра, изјави дека на аудио-снимката од контролата на летање се слушнал силен удар околу 45 секунди по издавањето на дозволата за полетување. Итните служби реагирале за помалку од една минута по несреќата.
Аеродромот Бангор ќе остане затворен најмалку до среда, додека екипи на Националниот одбор за безбедност во сообраќајот спроведуваат истрага на местото на настанот, и покрај екстремните зимски услови. Во исто време, силната снежна бура доведе до откажување на повеќе од 12.000 летови низ САД и остави стотици илјади домаќинства без електрична енергија.
