Словачкиот премиер Роберт Фицо предизвика бура во дипломатските кругови на ЕУ откако отворено ја изрази својата загриженост за психолошката состојба на американскиот претседател Доналд Трамп. Според извори на „Политико“, Фицо го опиша впечатокот од приватната средба со Трамп, одржана на 17 јануари во Мар-а-Лаго, како „опасен“.
Овој потег е необичен за Фицо, кој досега често ги поддржуваше ставовите на Трамп за „слабостите на Европа“. Но овој пат, дипломатите велат дека словачкиот лидер не можел да ја сокрие загриженоста за однесувањето на американскиот претседател. Тие, сепак, нагласуваат дека не се запознаени со конкретните коментари на Трамп што ја предизвикале реакцијата на Фицо.
Белата куќа реагираше остро. Портпаролката Ана Кели ги нарече обвинувањата „целосно лажни информации од анонимни европски дипломати кои се обидуваат да привлечат внимание“ и го опиша состанокот како „позитивен и продуктивен“.
Фицо, кој не е туѓ на контроверзни изјави, неодамна предизвика реакции и со својата проценка за конфликтот во Украина. Тој тврди дека борбите би можеле да завршат до 1 ноември 2027 година, по што „сите ќе се вразумат“ и ќе се обидат да ги обноват деловните врски со Русија.
