Двајца агенти на Царинската и граничната заштита на САД (ЦБП) се привремено отстранети од должност по смртоносниот инцидент во Минеаполис, во кој за време на викендот беше убиен 37-годишниот Алекс Џефри Прети, болничар на одделот за интензивна нега. Според официјални лица, суспензијата е стандардна процедура додека траат истрагите за случаи со употреба на огнено оружје.
Според прелиминарниот извештај доставен до Конгресот, кој го објави Си-Би-Ес Њуз, двајцата агенти пукале од своето службено оружје за време на инцидентот. Во документот не се наведува дека Прети се обидел да го извади или употреби своето огнено оружје.
Реконструкцијата покажува дека агентите спроведувале рација во саботата наутро, кога еден од нив им пришол на две жени и им наредил да се тргнат од патот. Откако тие не постапиле по наредбата, агентот физички ги оттурнал, при што една од жените се судрила со Прети. Следувал обид агентот да ги отстрани од местото, употреба на солзавец и обид за приведување на Прети, кој се спротивставил, по што настанала физичка пресметка.
За време на тепачката, еден агент повеќепати извикал дека Прети има пиштол. Неколку секунди подоцна, двајцата агенти отвориле оган – едниот со службен пиштол Глок 19, а другиот со Глок 47. По пукањето, еден од агентите го зел пиштолот на Прети, го испразнил и го ставил во службено возило. Извештајот не посочува дека Прети се обидел да го употреби оружјето.
Овие наоди се разликуваат од претходните соопштенија на Министерството за внатрешна безбедност, во кои се тврдеше дека само еден агент пукал во самоодбрана и дека Прети им се приближил со пиштол. Таквите тврдења не се содржани во извештајот на Канцеларијата за професионална одговорност. Полицијата во Минеаполис потврди дека Прети легално поседувал и носел оружје.
Дополнителни сомнежи за текот на истрагата предизвикува начинот на кој било постапено со пиштолот на Прети, кој бил отстранет од местото на настанот и складиран во возило, без јасни податоци за негово евидентирање како доказ. Истрагата ја води одделот за имиграција и царинска контрола на Министерството за внатрешна безбедност, со паралелни внатрешни постапки во ЦБП и известување до генералниот инспектор.
