Граничните премини кон земјите од Европската унија продолжуваат да се соочуваат со прекини во протокот на стоки поради протестите на камионските превозници од Србија и Босна и Херцеговина, кои петти ден по ред ги блокираат товарните терминали. Во меѓувреме, возачите од Црна Гора и Северна Македонија го прекинаа својот протест, откако Европската комисија претстави нова визна стратегија која би го олеснила престојот на професионалните возачи во Шенген зоната.
Во врска со кризата, на 3 февруари е закажан состанок на министрите од сите земји од Западен Балкан со претставници на ЕК. Целта на средбата е да се најде трајно решение за ограничувањата со кои се соочуваат превозниците на територијата на Шенген, а за тоа вчера шефот на Делегацијата на ЕУ во Босна и Херцеговина, Луиџи Сорека, телефонски ја информира претседавачката со Советот на министри, Борјана Кришто.
Тие разговараа за сериозните последици од блокадите – прекин на непречениот проток на стоки и нарушување на меѓународниот транспорт, кои се директно погодени од протестите. Новата визна стратегија на ЕУ, како што најави Комисијата, има за цел да обезбеди поголема флексибилност за прекуграничните работници и да им овозможи полесно движење на професионалните возачи.
Протестите започнаа на 26 јануари, кога возачите од Македонија, Србија, Црна Гора и Босна и Херцеговина излегоа на граничните премини во знак на револт против новиот систем за контрола на влез и излез (ЕЕЅ) во Шенген зоната, кој, според нив, дискриминира превозници од земјите од Западен Балкан.
