Македонската машка ракометна репрезентација денеска ќе го дознае противникот за баражот за пласман на Светското првенство 2027, кое ќе се одржи во Германија. Извлекувањето на двојките е закажано за 14:30 часот.
Со пласманот на 14. место на Европското првенство 2026, кое завршува утре, Македонија обезбеди директен настап во третата бараж-фаза, што значи дека ќе игра само еден бараж двомеч, без претходни елиминации.
Првата фаза од баражите веќе е завршена, втората ќе се игра во март 2026, додека баражот 3, во кој учествува и нашата селекција, е закажан за периодот од 13 до 17 мај 2026 година, со натпревари дома и на гости.
Македонија се наоѓа меѓу носителите во баражот 3, заедно со Франција, Словенија, Норвешка, Шпанија, Швајцарија, Фарски Острови, Холандија и Австрија, што значи дека нема да се сретне со ниту една од овие репрезентации.
Во групата на неносители и потенцијални противници се Чешка, Италија, како и победниците од следните дуели: Босна и Херцеговина – Косово, Грузија – Израел, Украина – Словачка, Србија – Литванија, Полска – Летонија, Турција – Романија, Грција – Белгија и Финска – Црна Гора.
Победниците од баражот 3 ќе обезбедат пласман на Светското првенство и ќе им се приклучат на веќе квалификуваните европски селекции: Германија како домаќин, Данска како актуелен светски првак, како и Хрватска, Исланд, Португалија и Шведска, кои завршија од третото до шестото место на ЕХФ ЕУРО 2026.
Светското првенство 2027 ќе се игра од 14 до 31 јануари во шест германски градови – Кил, Минхен, Хановер, Штутгарт, Келн и Магдебург.
