Американската Агенција за соработка во одбраната и безбедноста (DSCA) објави дека Израел ќе набави ново воено вооружување од САД, вклучувајќи 30 борбени хеликоптери „Апачи“ и сродна опрема во вредност од околу 3,8 милијарди долари. Дополнително, договорено е Израел да добие 3.250 заеднички лесни тактички возила за 1,98 милијарди долари, опрема за оклопни транспортери за околу 740 милиони долари и лесни повеќенаменски хеликоптери за приближно 150 милиони долари.
САД се најголем сојузник на Израел во делот на воената поддршка и продажбата на оружје.
Покрај тоа, Стејт департментот ја одобри и набавката на 730 ракети за системот за воздушна одбрана „Патриот“ и сродна опрема за Саудиска Арабија, во вредност од девет милијарди долари. DSCA го информираше Конгресот на САД за овие планови.
Одлуките доаѓаат во време на зголемени тензии на Блискиот Исток, откако претседателот на САД, Доналд Трамп, во последните недели упатуваше закани кон Техеран поради насилното задушување на протестите во Иран и зголеми американското воено присуство во регионот.
