Американскиот претседател Доналд Трамп утре официјално ќе го укине контроверзниот закон од 2009 година, воведен за време на мандатот на Барак Обама, кој ја постави основата за борбата на САД против емисиите на стакленички гасови. Ова го најави портпаролката на Белата куќа, Каролин Ливит, додавајќи дека укинувањето на законот ќе овозможи „заштеда на пари за Американците“.
Законот, познат како „откривање на загрозеност“, прогласи шест стакленички гасови – вклучувајќи CO2 и метан – за опасни по јавното здравје, што отвори пат за низа федерални регулативи насочени кон намалување на емисиите од автомобили, камиони и електрани. Со неговото укинување, овие ограничувања се наоѓаат под директна закана, а администрацијата на Трамп добива зелен сигнал за укинување на уште поголем број регулативи кои ја контролираат индустријата на нафта и јаглен.
Научниците реагираат со гласна осуда. Повеќе од 1.000 експерти изразија загриженост дека ваквиот чекор ќе значи сериозен удар врз климатските политики на САД, најголемиот светски емитер на стакленички гасови. „Научните докази за климатските промени предизвикани од човекот беа недвосмислени уште во 2009 година, а денес се уште поалармантни“, предупредија тие во јавно писмо.
Администрацијата, меѓутоа, ја минимизира улогата на човековата активност, тврдејќи дека ефектите од стакленичките гасови се глобални и индиректни, а не локално опасни, па затоа не заслужуваат третман на „загадувачи“ во традиционална смисла. Белата куќа исто така потенцира дека укинувањето на законот ќе помогне да се намалат цените на новите автомобили, кои по пандемијата од коронавирусот растеа години наназад.
