Британските воени сили ќе го удвојат својот број во Норвешка во следните три години, како одговор на зголемените руски активности во Арктикот, објави „Би-Би-Си“. Министерот за одбрана Џон Хили најави дека сегашните околу 1.000 војници ќе се зголемат на 2.000, нагласувајќи ја сериозноста на заканата од северниот сосед.
„Русија претставува најголема закана за безбедноста на Арктикот и Далечниот Север што ја имаме видено од времето на Студената војна“, изјави Хили, додавајќи дека растат и барањата за заштита на регионот. Одлуката следува по повторното отворање на руските бази и интензивираното воено присуство во северните предели, што предизвикува загриженост кај НАТО сојузниците.
Во рамките на новата иницијатива „Арктик Сентри“, предложена од министерката за надворешни работи Ивет Купер, ќе се зајакне надзорот и безбедноста во регионот, слично на веќе воспоставените НАТО центри во Балтикот и на Исток. Министерот Хили ќе се сретне со своите колеги од Алијансата во Брисел за да ги разгледаат деталите и стратегиите за проширување на присуството.
1.500 командоси од Кралските маринци ќе учествуваат во големата НАТО-вежба „Cold Response“ во март, како дел од проширената стратегија, која ќе се одржи низ Норвешка, Финска и Шведска. Вежбата е дизајнирана за да ги обучи сојузничките сили за операции во екстремни арктички услови, потврдувајќи ја сериозната подготвеност на НАТО за потенцијални закани во регионот.
