Масивен колапс на земјиштето во селото Пондок Балик во Индонезија, уништи големи површини обработливо земјиште и делови од патната инфраструктура, оставајќи ги локалните фармери во страв дека колапсот ќе продолжи.
Според локалните извори, кратерот веќе проголтал десетици илјади квадратни метри ниви, а во изминатите години се проширил од околу 27.000 на над 30.000 квадратни метри. Длабочината на колапсот достигнува и до 100 метри, што го прави еден од најголемите вакви геолошки настани во регионот.
Освен земјоделските површини, бездната зафатила и дел од главниот пат што ги поврзува околните области, како и енергетска инфраструктура, вклучително и високонапонски столб. Ова дополнително ја зголемува опасноста од прекин на сообраќајот и електроснабдувањето.
Геолозите посочуваат дека феноменот не е класична карстна дупка, туку резултат на нестабилни вулкански карпи кои при контакт со вода се раздвижуваат, предизвикувајќи постепено пропаѓање на тлото и лизгање на земјиштето.
За локалното население, најголем проблем е загубата на обработливите површини и неизвесноста дали колапсот ќе се прошири кон населените места.
Фармерите стравуваат дека ќе останат без егзистенција ако процесот продолжи со истото темпо.
Надлежните служби ја следат состојбата, но експертите предупредуваат дека поради природата на теренот и постојаното движење на почвата, опасноста од нови пропаѓања останува висока.
ВИДЕОТО МОЖЕ ДА ГО ПОГЛЕДНЕТЕ ТУКА
