Рано утрово, околу 7 часот, патнички воз со десетици луѓе на борд излета од шините во близина на Гопенштајн, во швајцарскиот кантон Валис, при што најмалку неколку лица се повредени, објави локалната полиција.
Според раните информации од кантоналниот штаб за итни случаи, возот што тргнал од Шпиц во 6:12 часот поутро кон Бриг, нагло излетал од пругата додека се движел низ планинскиот појас, откако го погоди лавина.
На местото на несреќата веднаш пристигнаа спасувачки екипи, пожарникари и медицински тимови кои работат на обезбедување на теренот и пружање помош на повредените. Сè уште се расчистуваат околностите, а властите најавија подетални информации во текот на денот.
Швајцарските федерални железници (SBB) потврдија дека сообраќајот меѓу Гопенштајн и Бриг е целосно стопиран поради инцидентот. Во возот на оператерот BLS AG се наоѓале околу 80 патници во моментот на несреќата, а операторот соопшти дека процесот на евакуација на преживеаните наскоро ќе започне.
