САД остануваат решени да го спречат Иран да се здобие со нуклеарно оружје, изјави американскиот потпретседател Џеј Ди Венс, по завршувањето на новата рунда преговори во Женева.
„Претседателот Доналд Трамп располага со широк спектар можности и инструменти за да обезбеди дека Иран нема да дојде до оружје за масовно уништување“, рече Венс во интервју за Фокс њуз.
Од своја страна, Иран ги негира обвинувањата за тајно развивање нуклеарно оружје и инсистира на своето право да користи нуклеарна енергија за мирни цели.
Изјавата на Венс доаѓа само неколку часа по дијалогот меѓу американските и иранските претставници во Женева. Претходно овој месец, првата рунда разговори за намалување на тензиите се одржа во Мускат, главниот град на Оман.
Ситуацијата дополнително се заостри откако Трамп во јануари најави дека „армада“ од воени бродови се упатува кон Иран. Воените бродови на САД се распоредени во регионов веќе неколку недели, што дополнително го зголемува напрегањето меѓу двете земји.
