Телевизија Телма објави снимки за кои се сомнева дека го прикажуваат осомничениот за серија брутални убиства во кумановскиот регион, случај што ја вознемири јавноста и отвори сомнежи за повеќе нерешени смртни случаи од изминатите две години.
Станува збор за млад маж од околината на Старо Нагоричане кој веќе е во притвор поради свирепото убиство на 78-годишна жена, но истрагата сега оди многу подалеку – обвинителството и полицијата проверуваат дали стои зад најмалку уште четири сомнителни смртни случаи.
86-годишна жена од Челопек успеала да преживее брутален напад во својот дом. Напаѓачот влегол додека била сама, а ја спасил случаен шум поради кој избегал, оставајќи ја повредена и во крв.
Само неколку дена подоцна, во Старо Нагоричане била пронајдена мртва 78-годишна жена која живеела сама. Таа била претепана и задушена со перница, а постојат индиции дека сторителот и ограбил дел од имотот. Токму овој случај довел до апсењето на осомничениот.
Пет случаи под лупа – можни и нови жртви
Според информации од истрагата, се преиспитуваат пет смртни случаи – три од оваа година и два од лани. Заедничко за сите жртви е што биле жени кои живееле сами, пронајдени мртви во своите домови, делумно соблечени, без претходно да биде побарана обдукција бидејќи првично не биле утврдени траги на насилство.
Обвинителството сега бара ексхумација на една 37-годишна жена, чија смрт била прогласена за предозирање со алкохол, но локалните жители уште тогаш се сомневале дека нешто не е во ред.
Старо Нагоричане, Челопек, Драгоманце и Клечовце се местата каде што се случиле нападите, сите на мала оддалеченост. Жителите велат дека осомничениот им бил познат по ситни кражби и често се движел со велосипед низ селата.
Полицијата и обвинителството засега не откриваат детали за текот на истрагата, но потврдуваат дека се проверува дали имало пропусти во претходните случаи кога смртите биле затворени без обдукција.
Снимките што ги објави Телма дополнително ја засилија загриженоста во јавноста, а истрагата треба да утврди дали станува збор за еден од најсериозните криминални случаи во поновата историја на регионот.
