Јакнењето на економските врски меѓу Македонија и Јапонија беше во фокусот на првиот бизнис-семинар посветен на директно поврзување на компаниите од двете земји, што на 11 март се одржа во Скопје во организација на Амбасадата на Јапонија.
Настанот донесе на едно место претставници на девет реномирани јапонски корпорации, кои работат во различни индустрии, од енергетика и фармација, до автомобилската индустрија, градежништвото и финансискиот сектор. Преку презентации тие ги претставија своите глобални портфолија, како и интересот за проширување на деловните активности во регионот.
Семинарот го отвори министерот за надворешни работи и надворешна трговија, Тимчо Муцунски, кој во своето обраќање изрази уверување дека ваквите иницијативи ќе придонесат за поголема трговска размена и за нов бран јапонски инвестиции во земјата.
Амбасадорката на Јапонија во Македонија, Сецуко Кавахара, во поздравниот говор нагласи дека директниот дијалог меѓу компаниите е клучен за создавање долгорочни партнерства, потенцирајќи дека ваквите средби овозможуваат подобро разбирање на деловните можности и потреби на двете страни.
Во рамки на програмата беше организирана и панел-дискусија, на која две македонски компании со долгогодишна соработка со јапонски партнери ги споделија своите искуства, предизвици и практични совети за успешна деловна комуникација со јапонскиот пазар. Сесијата отвори простор за размена на идеи и конкретни препораки за идни партнерства.
Собирот заврши со неформално вмрежување, каде учесниците имаа можност директно да разговараат за потенцијални деловни проекти и соработка.
За дополнителни информации, заинтересираните можат да се обратат на: contact@sk.mofa.go.jp.
