Албанската дијаспора во Италија има важна улога во социјалната и економската структура на земјата. Според најновите податоци на Евростат, во Италија живеат околу 557 илјади лица родени во Албанија.
Од нив, 416 илјади се албански државјани, додека околу 141 илјада веќе го поседуваат италијанското државјанство. Со тоа, Албанците се втората најголема странска заедница во Италија, веднаш по Романците, кои бројат околу 900 илјади, или 13,5% од сите емигранти. Албанците, пак, сочинуваат 8,3% од вкупниот број странци во земјата.
Силното присуство на Албанците во Италија станува уште поимпресивно ако се спореди со населението на матичната земја. Романија има околу 19 милиони жители, додека Албанија брои 2,36 милиони. Тоа значи дека во однос на домашното население, албанската заедница во Италија е значително поголема од романската.
Иако Евростат не објавува податоци за Грција, медиумските извештаи укажуваат дека над 600 илјади Албанци живеат таму, а повеќе од 200 илјади веќе поседуваат грчки пасош.
