Турција усвои нов закон што драстично го менува пристапот на младите кон дигиталниот свет, воведувајќи целосна забрана за користење социјални мрежи за лица помлади од 15 години. Со оваа регулатива, државата ја префрла тежината врз самите технолошки платформи, кои ќе мора да имплементираат напредни системи за проверка на возраста за да спречат отворање профили од деца.
Законот, кој се очекува да започне со примена по шестмесечен преоден рок, не застанува само на забраната. Тој носи и значително зајакнување на родителските алатки за контрола, овозможувајќи поголем увид и управување со времето кое децата го поминуваат пред екраните. Истовремено, за дигиталните платформи се воведуваат строги обврски, меѓу нив и брза реакција при појава на штетна содржина, која во итни случаи мора да биде отстранета во рок од еден час.
Оваа законска офанзива доаѓа во период кога прашањето за безбедноста на децата во онлајн просторот сè поинтензивно се отвора низ Европа. Од Париз пристигнуваат дополнителни идеи за ограничување на дигиталните навики на младите, меѓу кои и предлогот на францускиот претседател Емануел Макрон за воведување месечен „ден без интернет“: концепт што треба да ги насочи младите кон спорт, читање и активности во реалниот живот.
Паралелно со овие иницијативи, во Европската унија се засилуваат консултациите за заеднички пристап кон дигиталната заштита на малолетниците. Претседателката на Европската комисија, Урсула фон дер Лајен, веќе разговарала со лидери од повеќе членки, меѓу кои Германија, Италија и Шпанија, за воспоставување унифицирани правила што би го ограничиле пристапот на децата до социјалните мрежи.
…
