Во Дебар Маало, во срцето на општина Центар, денес од 17 часот ќе оживее уште едно сеќавање на големиот македонски драмски автор Горан Стефановски. Кај спомен-клупата посветена на неговото име ќе се одржи културен настан со кој ќе се одбележи неговиот роденден, но и трајното влијание што го остави врз македонската уметност и јавен живот.
Настанот, кој е дел од годишната културна програма на Општина Центар, е замислен како спој на уметност, музика и лични приказни. Преку разговори, настапи и уметнички интерпретации, присутните ќе имаат можност да се навратат на духот, хуморот и креативната сила на Стефановски.
Посебен акцент ќе има присуството на неговиот син, Игор Стефановски, кој ќе биде домаќин на вечерта. Тој ќе разговара со пријатели и соработници на својот татко, оживувајќи спомени за заедничките родендени, но и за неговите идеи, секојдневие и творечкиот пат.
Програмата ќе биде исполнета со повеќе уметнички сегменти: хорот „Мирче Ацев“ ќе изведе избор од омилените песни на Стефановски, младата џез група „Трицкл“ ќе донесе современа музичка енергија, а актерите ќе интерпретираат монолози инспирирани од неговите драми. Визуелната димензија ќе ја надополни изложба на портрети на Стефановски од уметникот Ненад Рафајловски, додека вечерната атмосфера ќе биде заокружена со DJ сет на Шурбе.
…
