Градоначалникот на Битола Тони Коњановски и амбасадорот на Шведска Ола Сулстром, денеска се обратија на настанот за вмрежување на Локалните економско-социјални совети (ЛЕСС), посветен на темата „Праведна енергетска транзиција во Пелагонија – нови вештини, иновации и одржлив економски развој”.
Настанот е во организација на МКЦ Битола и Еко-свест од Скопје, а во соработка со Локалниот економско-социјален совет на општина Битола.
На еден од панелите свое обраќање имаше и заменик претседавачот на Локално економскиот социјален совет на Битола, Борче Димитровски.
„Праведната транзиција е реалност и повеќе пати Локалниот економско социјален совет и Општина Битола ги отворале овие значајни теми кои се специфични сами по себе, но треба да ги прилагодиме на ниво за секој граѓанин да разбере за што конкретно зборуваме. Едно е да имаме документи и хартија, а сосема друго е она што се случува на терен. Поддеднакво е важно изготвувањето на плановите, документите за патоказот на праведната транзиција, но уште поважно е како тоа се реализира на терен. Општина Битола има капацитет за подготовка на проектни документации и може да се вклопи согласно законските регулативи и надлежности на општината“, рече Димитровски.
Според него еден од индикаторите кој што треба за 2026 и поконкретно за 2027 година да се воведе е да се следи бројот на ново отворени зелени работни места во Битола, која има потенцијал за тоа.
Пред петнаесет дена 11 парцели се продадени во Индустриската зона Жабени и тоа значи нови работни места и таа зона е една иднина за отворање нови зелени работни места, истакна Димитровски.
Пред присутните поздравни обраќања имаа и претседавачот на ЛЕСС, Никола Трпеновски, директорот на МКЦ Битола, Сашо Додовски и Ана Чоловиќ Лешоска, извршна директорка на Еко Свест.
Емилија Сарафска од работна група за праведна транзиција при Министерство за енергетика, го објасни текот на реализација на акцискиот годишен план и работата на работните групи во министерството.
Настанот има за цел да поттикне конструктивен дијалог и засилена соработка помеѓу институциите, локалната самоуправа, бизнис секторот, синдикатите, образовните институции и граѓанските организации. Фокусот ќе биде ставен на напредокот во процесот на праведна енергетска транзиција, имплементацијата на планираните активности, како и на креирање идни насоки за одржлив развој на Пелагонискиот регион.
…
