Рускиот претседател Владимир Путин денеска на воената парада на Црвениот плоштад во Москва, по повод Денот на победата над нацистичка Германија во Втората светска војна, изрази уверување дека Русија ќе излезе како победник во војната против Украина.
Парадата се одржа под засилени безбедносни мерки, додека Путин и повеќе странски лидери го следеа настанот. Иако беше прогласен тридневен прекин на огнот со посредство на САД, тензиите меѓу Русија и Украина останаа присутни.
Во своето обраќање, Путин ги пофали руските сили кои се борат во Украина, тврдејќи дека се соочуваат со „агресивна сила поддржана од НАТО“. Тој истакна дека „победата секогаш била и ќе биде на страната на Русија“, нагласувајќи ги „храброста и единството“ како клучни за успехот.
Оваа година парадата за првпат по речиси две децении се одржа без прикажување на тенкови, ракети и тешко вооружување, освен традиционалниот прелет на воени авиони.
Путин одржа говор од околу девет минути и прогласи минута молк во чест на загинатите во Втората светска војна. Потоа беше прикажано видео за најновата руска воена опрема.
Рускиот Ден на победата останува најзначаен државен празник во земјата, со кој се одбележува жртвата од околу 27 милиони загинати во Втората светска војна, позната во Русија како Големата татковинска војна.
На настанот присуствуваа повеќе странски лидери, меѓу кои претставници од Белорусија, Казахстан, Узбекистан, Лаос и Малезија, како и словачкиот премиер Роберт Фицо.
…
