Густ чад и понатаму се издига над градската депонија во Радовиш, иако огнената стихија која избувна во петокот попладне веќе нема отворен пламен. Состојбата, сепак, сè уште се смета за активна, бидејќи процесот на целосно гаснење не е завршен.
Локалните власти, заедно со противпожарните екипи и јавните служби, се постојано на терен и работат на стабилизирање на ситуацијата. Градоначалникот на Радовиш и командант на Кризниот штаб, Љупче Почивалец, посочи дека интервенцијата се одвива координирано и во континуитет, со цел пожарот конечно да се стави под целосна контрола.
По препораки од стручни институции со искуство во справување со вакви инциденти, е донесена одлука за затрупување на депонијата со песок и земја. Оваа мерка има за цел да го намали ширењето на чадот и да го задуши жариштето под површината.
Паралелно, Кризниот штаб одржува редовни состаноци и, во соработка со Центарот за јавно здравје во Штип, се изготвени препораки насочени кон заштита на здравјето на населението.
Жителите се предупредуваат да го ограничат престојот на отворено, да ги држат затворени прозорците и вратите, како и да користат заштитни маски кога е неопходно излегување надвор. Посебно внимание им се упатува на ранливите категории: децата, постарите лица, бремените жени и лицата со хронични заболувања, кои се советуваат да останат во затворен и заштитен простор.
Од општината апелираат на трпеливост и придржување кон сите насоки, додека траат напорите за конечно гаснење и санација на депонијата.
…
