Основното јавно обвинителство Основно јавно обвинителство Скопје донесе наредба за спроведување истражна постапка против 76-годишен државјанин на Косово, осомничен за тешки дела против безбедноста на луѓето и имотот во сообраќајот, по трагичната несреќа на скопската обиколница во која загинаа четири лица.
Според информациите од Обвинителството, осомничениот управувал товарно возило „МАН“ со полуприколка со косовски регистарски таблички, движејќи се по северната обиколница на Скопје од запад кон исток.
Во близина на клучката Мирковци, како што наведуваат од ОЈО, возачот не ја приспособил брзината на условите на патот и густината на сообраќајот, по што изгубил контрола над камионот, ја пробил металната заштитна ограда и преминал на спротивната коловозна лента.
Таму директно се судрил со автомобил „БМВ“ кој се движел од спротивниот правец. По силниот удар, и камионот и автомобилот се запалиле, а четворицата патници во автомобилот починале на лице место.
Јавниот обвинител доставил предлог за определување мерка притвор, поради опасност од бегство и можност осомничениот да го повтори делото.
…
