Двајца косовски државјани завршија во притвор по полициска акција на автопатот Гевгелија – Неготино, во која беа откриени седум мигранти од Египет скриени во комбе со косовски регистарски таблички. Акцијата била реализирана во раните утрински часови во близина на наплатната станица кај Демир Капија.
Според информациите од Министерството за внатрешни работи, полициски службеници од Полициската станица за граничен надзор Михајлово околу 06:30 часот сопреле две возила – „фолксваген транспортер“, зад чиј волан бил 42-годишниот А.Г., и „шкода октавија“, управувана од 39-годишниот Г.Г., двајцата државјани на Косово.
При извршената контрола во комбето биле пронајдени седум лица мигранти од Египет. Истражните органи утврдиле дека автомобилот „шкода октавија“ се користел како претходница за движењето на комбето, со цел да се избегнат полициски контроли.
За случајот веднаш бил известен јавен обвинител од Основното јавно обвинителство за гонење организиран криминал и корупција, по што против осомничените е поднесена кривична пријава за криумчарење мигранти.
Судот им определил мерка притвор во траење од 30 дена, а двајцата осомничени се префрлени во КПУ Затвор „Скопје“. Мигрантите, пак, се згрижени во Центарот за баратели на азил во Визбегово, каде ќе бидат преземени понатамошни постапки согласно законските процедури.
…
